Міржақып Дулатовтың туғанына 140 жыл толуына орай Орталық аудандық модельдік кітапхана  кітапханашысы Қ.Қ. Балабаев «Ұлттың рухын оятқан» атты кітап көрмесін ресімдеп, шолу жүргізді. Көрменің мақсаты - қазақ халқының рухани тарихындағы ұлы тұлғаның бай мұрасын кеңінен таныту, өскелең ұрпақты отансүйгіштікке, елжандылыққа тәрбиелеу.

Көрмеде ұсынылған  туындылар: «М. Дулатұлы. Өлеңдер, роман, пьеса, әңгімелер. 1 - том» - Ел тағдырын арқау еткен өлеңдер, әлеуметтік мәні зор романдар, драмалық шығармалар мен тағылымды әңгімелер топтастырылған. «М. Дулатов шығармалары» - Әдебиет, публицистика және ғылым саласындағы еңбектерін қамтитын жинақ. «Бақытсыз Жамал» романы - Қазақ әдебиетіндегі алғашқы роман, әйел теңсіздігі мен ұлттық сананың оянуы суреттелген. Гүлнар Міржақыпқызы Дулатованың «Алаштың сөнбес жұлдыздары» - Естелік - зерттеу еңбегі, әкесі және Алаш арыстары туралы тың деректер қамтылған. «Дулатов М. Өлең - жырлар, пьеса, көсем сөздер мен сын - зерттеу мақалалары» - Ақынның поэзиясы, публицистикасы, әдеби сындары мен ұлттық мүддеге арналған мақалалары берілген.

Көрме Міржақып Дулатовтың бай шығармашылық мұрасын дәріптеуге, ұлт тарихындағы орнын айқындауға және жас ұрпақтың бойында елжандылық сезімін қалыптастыруға зор үлес қосты.